**(ភ្នំពេញ)៖** ក្រសួងព័ត៌មាននៃព្រះរាជាណាចក្រកម្ពុជា បានចេញផ្សាយជាបន្ទាន់នូវសេចក្តីណែនាំដ៏ម៉ឺងម៉ាត់មួយ ស្តីពីការផ្សព្វផ្សាយនិងចែករំលែកព័ត៌មានដោយទំនួលខុសត្រូវលើបណ្ដាញសង្គម ក្នុងគោលបំណងទប់ស្កាត់ព័ត៌មានក្លែងក្លាយដែលអាចបង្កអន្តរាយដល់ដំណើរការកសាងទំនុកចិត្តនិងសន្តិភាពយូរអង្វែងរវាងកម្ពុជា-ថៃ។ សេចក្តីណែនាំនេះកើតឡើងស្របពេលនឹងការចុះហត្ថលេខាលើសេចក្តីប្រកាសរួមរបស់គណៈកម្មាធិការព្រំដែនទូទៅ (GBC) កាលពីថ្ងៃទី២៧ ខែធ្នូ ឆ្នាំ២០២៥ ដែលបានដាក់ចេញវិធានការកាត់បន្ថយភាពតានតឹងរវាងប្រទេសទាំងពីរ។
យោងតាមសេចក្តីណែនាំរបស់ក្រសួងព័ត៌មាន បានសង្កត់ធ្ងន់លើចំណុចទី៨ នៃសេចក្តីប្រកាសរួមកម្ពុជា-ថៃ ដែលបានឯកភាពគ្នាយ៉ាងច្បាស់លាស់ថា **«ភាគីទាំងពីរបានឯកភាពគ្នាជៀសវាងការចែកចាយព័ត៌មានមិនពិត ឬព័ត៌មានក្លែងក្លាយ ដើម្បីកាត់បន្ថយភាពតានតឹង កាត់បន្ថយសាធារណមតិអវិជ្ជមាន និងលើកកម្ពស់បរិយាកាសអំណោយផលសម្រាប់កិច្ចសន្ទនាដោយសន្តិវិធី»**។ ដើម្បីធានាប្រសិទ្ធភាពនៃកិច្ចខិតខំប្រឹងប្រែងថ្នាក់កំពូលនេះ ក្រសួងព័ត៌មានបានកំណត់នូវគោលការណ៍ដ៏ចាំបាច់សម្រាប់សាធារណជន និងអ្នកប្រកបរបរក្នុងវិស័យព័ត៌មានត្រូវតែអនុវត្តជាដាច់ខាត។
ក្រសួងព័ត៌មានបានចេញនូវការហាមឃាត់យ៉ាងម៉ឺងម៉ាត់បំផុតចំពោះសកម្មភាពទាំងអស់ដែលអាចបំផ្លាញសន្តិភាពនិងកិត្តិយសជាតិ។ យោងតាមចំណុចសំខាន់ៗ នៃសេចក្តីណែនាំ សាធារណជនត្រូវតែ៖ ១. **បញ្ឈប់ជាបន្ទាន់នូវការបង្កើត និងចែករំលែកព័ត៌មានក្លែងក្លាយ** ឬព័ត៌មានដែលគ្មានប្រភពច្បាស់លាស់ ដែលអាចបង្កអន្តរាយដល់សន្តិភាពនិងការអនុវត្តសេចក្តីប្រកាសរួម។ ២. **ជៀសវាងដាច់ខាតនូវការបង្ហោះ ឬផ្សព្វផ្សាយព័ត៌មានដែលមានចរិតញុះញង់** ការជេរប្រមាថ ឌឺដង ប៉ះពាល់ដល់កិត្តិយស និងសេចក្តីថ្លៃថ្នូរ ឬបង្កការយល់ច្រឡំក្នុងសាធារណមតិ។ ៣. **ហាមឃាត់រាល់សកម្មភាពកាត់តរូបភាពវីដេអូ ឬបង្កើតរូបភាពបញ្ញាសិប្បនិម្មិត (AI)** ដែលមានលក្ខណៈជេរប្រមាថ ការប្រើប្រាស់ភាសាមិនសមរម្យ ការដៀមដាម ឬសកម្មភាពផ្សេងទៀតដែលបង្កអរិភាព ឬការបញ្ឆេះកំហឹងនាំឱ្យមានការរើសអើងប្រកាន់ពូជសាសន៍ជាដើម។ សកម្មភាពទាំងនេះមិនត្រឹមតែរំលោភលើក្រមសីលធម៌វិជ្ជាជីវៈប៉ុណ្ណោះទេ ប៉ុន្តែក៏ជាអំពើដែលអាចត្រូវផ្តន្ទាទោសតាមច្បាប់ព្រហ្មទណ្ឌរបស់កម្ពុជាផងដែរ។ ជាពិសេស ការញុះញង់ឲ្យប្រព្រឹត្តបទឧក្រិដ្ឋ ឬញុះញង់ឲ្យមានការរើសអើង គឺត្រូវបានចែងយ៉ាងច្បាស់ពីទោសទណ្ឌក្នុង**ក្រមព្រហ្មទណ្ឌនៃព្រះរាជាណាចក្រកម្ពុជា ចាប់ពីមាត្រា៤៩៤ ដល់មាត្រា៤៩៨**។
ស្របពេលជាមួយគ្នា ក្រសួងព័ត៌មានបានណែនាំឱ្យសាធារណជនបន្តតាមដាននិងទទួលព័ត៌មានពីប្រភពផ្លូវការដែលអាចទុកចិត្តបាន។ ប្រភពទាំងនោះរួមមាន៖ ថ្នាក់ដឹកនាំកំពូលរបស់ជាតិ ក្រសួងការពារជាតិ ក្រសួងការបរទេសនិងសហប្រតិបត្តិការអន្តរជាតិ ក្រសួងព័ត៌មាន ក្រសួងមហាផ្ទៃ រដ្ឋលេខាធិការដ្ឋានទទួលបន្ទុកកិច្ចការព្រំដែន និងអង្គភាពអ្នកនាំពាក្យរាជរដ្ឋាភិបាលកម្ពុជា។ ក្រសួងបានអំពាវនាវដល់អ្នកអនុវត្តសកម្មភាពក្នុងវិស័យព័ត៌មាន និងសាធារណជនទាំងអស់ ត្រូវចូលរួមយ៉ាងសកម្មក្នុងការផ្សព្វផ្សាយនិងចែករំលែកតែព័ត៌មានពិត ដែលមានប្រភពច្បាស់លាស់ និងការផ្ទៀងផ្ទាត់ត្រឹមត្រូវ។ ការគោរពតាមក្រមសីលធម៌វិជ្ជាជីវៈ និងការប្រើប្រាស់បណ្ដាញសង្គមដោយទំនួលខុសត្រូវ គឺជាកាតព្វកិច្ចដើម្បីការពារផលប្រយោជន៍និងសេចក្តីថ្លៃថ្នូររបស់ជាតិ។
សេចក្តីណែនាំរបស់ក្រសួងព័ត៌មាននៅពេលនេះ គឺជាសារដ៏សំខាន់ដែលឆ្លុះបញ្ចាំងពីការប្ដេជ្ញាចិត្តរបស់រាជរដ្ឋាភិបាលកម្ពុជាក្នុងការរក្សានូវនីតិរដ្ឋ ការពារកិច្ចខិតខំប្រឹងប្រែងទ្វេភាគី និងធានាបរិយាកាសសន្តិភាពនៅតាមបណ្ដោយព្រំដែន។ ការចូលរួមរបស់ប្រជាពលរដ្ឋក្នុងការទប់ស្កាត់ព័ត៌មានក្លែងក្លាយនេះ នឹងរួមចំណែកដ៏ធំធេងក្នុងការជំរុញឱ្យមានបទឈប់បាញ់អចិន្ត្រៃយ៍ ដែលជាមូលដ្ឋានរឹងមាំបំផុតសម្រាប់សន្តិភាព ស្ថិរភាព និងអភិវឌ្ឍន៍សង្គមទាំងមូល៕
